Historia di Tumba
Despues ku 23 di ougùstùs 1968, porfin músikonan di e tempu ei a selebrá e echo ku ofisialmente nan organisashon a mira lus di bida, e frekuensia di e reunionnan a kuminsá tuma lugá ku mas frekuensia. E sitionan kaminda e reunionnan tabata tuma lugá ta Patricks Musicians Supplies, ora ta trata di un grupo chikí i na Zeemanshuis (Hotel Stellaris) ora tur músiko mester bini huntu.
Ora un organisashon lanta nobo, naturalmente e tópikonan pa diskutí ta hopi. Na momentu ku a lanta Komité Karnaval na 1971, músika den karnaval a bira un tópiko hopi interesante.
Sr. Peng de Windt (q.e.p.d.) e tempu ei ofisialmente tabata sekretario di Asosiashon di Músiko, pero pa su habilidat pa komuniká ku e miembronan, tabata dirigí e reunionnan di Asosiashon, na nomber di Sr. Newburn Patricks (q.e.p.d.)
Peng tabata mustra e músikonan riba e importansia pa laga nos músika dominá den e organisashon di Karnaval ku ta a kaminda. Den notulo di Komité Karnaval ( mira kopia) tambe ta menshoná kuantu diskushon tabata tin riba e proposishon di Peng de Windt, pa usa nos ritmo di tumba pa djump den karnaval. Peng tabata forma parti tambe di Komite Karnaval. Tabata hopi grasioso pa mira kon músikonan tabata lanta fo’i nan stul pa duna demostrashon kon mester marcha riba nos dushi ritmo.
Asina pues despues di vários deliberashon i reunionnan importante entre kua por menshoná dia 12 di novèmber 1970 na Avila Beach Hotel, Komité Karnaval a tuma e desishon pa e ritmo di tumba bira e ritmo prinsipal di marcha di karnaval. Konsekuentemente a forma un komishon pa organisá e Festival di Tumba kombiná ku Festival di Calypso
Athunto por mira tambe kopia di e promé reglanan pa Festival di Tumba, ku a keda kompilá i redaktá pa un komishon konsistiendo di Juan Camelia (q.e.p.d.), Alfred van der Dijs (q.e.p.d.) i Manuel “Shoma” Salsbach (q.e.p.d.).
E festival di Tumba di 1971 bou di ouspisio di Komité Karnaval 1971, Presidí pa Sr. Omalio Merien a tuma lugá dia 1 di februari 1971 den Teater Roxy.
Un bon públiko a okupá e sala a disfrutá di e promé partisipantenan. Esnan ku a partisipá na e promé Festival di Tumba tabata e.o. Boy Dap, Macario Prudencia, Luis Borgschot, Archimides Thomasa, Rene Samson, Srta. Emys Filomena Archibald, Srta. Mavis Albertus, Remilio Eisden, Srta. Julia Herrera, Roberto Serberie, Felix Concepcion, Edward de Jongh, Emilio Prudencia, Leslie Cransten. E ganadó apsoluto a resultá Boy Dap ku e tumba “Bash’é”, akompañá pa Estrellas del Caribe.
Ta bon pa remarka ku públiko kompletu tabata di akuerdo ku e eskoho di Bash’é di Boy Dap, pero e diskushon tabata rondó di e promé finalista. Hurado a skohe “Nos Karnaval” di Kimo Candelaria, miéntras e públiko a mira Rene Samson ku nos karnaval komo number dos. Miembronan di e promé hurado tabata Srta. Clisia Henriquez,, Sr. Chall Atalita i Henny van Velzen.
Na 1972 Erwin Kastaneer, akompañá pa Estrellas del Caribe a keda koroná komo Rei di Tumba ku e número “Den Karnaval” i interes pa partisipá na e festival a krese.
E resultado di e di dos festival di tumba tabata lo siguiente:
Rei di Tumba Erwin Kastaneer ku “Den Karnaval”
1 e Finalista Stanley Reinilia ku “Mi no sa”
2do Finalista Celcio Calmes ku “Pusha Karnaval”
E kuerpo di hurado a konsistí di Srs. Privania, Victoria i Sra. Locadia. Tabata tin hopi krítika i hopi t’esnan ku a mira Luti Samson ku “Hisa Benta” o Boy Dap ku “Bon Bon” komo ganadó.
Despues di e di dos festival, Asosiashon a reuní ku su miembronan pa evaluá e festival. Tabata tin hopi krítika riba e kompensashon ku gruponan musikal tabata risibí i pa kolmo hopi biaha e cheknan no por a keda kobra. Ademas tabata tin vários remarke riba e forma di organisashon i promoshon. Sr. Peng de Windt a hiba e mensahenan pa trata nan den seno di Komité.
Despues ku Asosiashon di Músiko i Komité Karnaval 1971 no por a yega na un akuerdo, músikonan a anunsiá algun akshon. Tantu Komité komo Asosiashon a hasi petishon pa organisá e Festival di Tumba a karnaval. E interes pa e festival di tumba di Asosiashon tabata grandi, miéntras ku Komité a risibí masha poko inskripshon.
Sr. Papy Jesurun, Diputado di Kultura di e tempu ei a intervení i a yama un reunion na Bestuurscollege ku tantu direktiva di Asosiashon komo Komité Karnaval. Asosiashon a forma un komishon bou di presidensia di Peng de Windt i demas miembronan Sr. Fecco Gomes, Nelson Boy de Windt i Alfred van der Dijs (q.e.p.d.)
E reunion ku a kuminsá 8 or di anochi a tèrminá 3 or di mardugá, ora partidonan a firma un akuerdo den kua a stipulá ku Asosiashon di Musiko lo organisá Festival di Tumba na 1973 den estrecho kolaborashon ku Komité Karnaval 1971. 10% di e entrada nèt lo bai pa Komité Karnaval, miéntras Asosiashon lo traha un repartishon di reseta pa su miembronan.
Asosiashon a forma un komishon dia 21 di yanüari 1973 konsistiendo di Don Juan Camelia, Alfred van der Dijs, Shoma Salsbach, tur di felis memoria i nan a presentá e siguiente repartishon:
-
67 ½ % pa agrupashonnan musikal partisipante
-
12 ½ % pa tumba ganadó
-
12 ½% pa Asosiashon
-
7 ½ % pa e areglo premiá
Ta bon pa remarka ku miembronan a keda hinter anochi durante e reunion menshoná dilanti di BC te ora e resultado a bira konosí.
Miembronan a aploudí e akuerdo, ya ku a bin kambionan grandi den e kompensashon finansiero. Pa ilustrá un ke otro por menshoná e.o. ku un agrupashon musikal tabata risibí apénas Naf. 50,-- pa kada número ku nan akompañá, miéntras ku e tumba ganadó tabata risibi Naf. 300,--, Promé Finalista Naf. 200,-- i 2do Finalista Naf. 100,-- komo premio.
E echo ku e espíritu di e akuerdo tabata ku Asosiashon lo organisá e festival, a lanta un interes enorme bou di e músikonan i alrededor di 30 inskripshon a keda registrá pa partisipá dia 12 i 14 di febrüari 1973 den Teater Roxy, miéntras ku dia 19 di febrüari 12 finalista klasifiká lo kompetí pa e premionan máksimo.
Resumiendo e promé parti nos mester konkluí ku 1971 i 1972 por ser konsiderá komo e prinsipio di nos festival kaminda tabata evaluá.
Di 1973 te ku awe ta e époka nobo di festival di tumba, kaminda a konosé kambionan drástiko den organisashon i interes pa e festival. Nos lo kier a repartí nos festival di tumba den e siguiente etapanan:
A. Festival di Tumba den sala kubri 1971 – 1978
-
Roxy 1971 – 1976
-
Industriehal Zeelandia 1977
-
Cinelandia 1978
B. Festival di Tumba di aire liber 1979 – 2004
-
Stadion di SUBT 1979 – 1982
-
SDK 1983
-
Stadion di SUBT 1984 – 1989
-
Curaçao Festival Center 1990 te ku awe
Den e periodo di sala kubri, alrededor di 800 persona tabata bishita e festival i ku un rekòrt di 1.500 persona na 1977 den Industriehal na Zeelandia.
Na 1979 un total di 3.500 persona a sinta den tribuna di Stadion di SUBT, miéntras ku na 1993 11.200 persona a paga pa drenta Curaçao Festival Center, kual ta e kantidat mas grandi registrá.
Durante añanan diferente aspekto di organisashon a kambia manera e.o:
-
Konstelashon di hurado
-
Sistema di Vota
-
Reglanan di e festival
-
Premiashon
-
Parti logístiko. (Sept up di diferente sekshonnan)
-
Dia di Inskripshon
-
Kantidat di partisipante
-
Interes di Públiko
-
Interes di Media
Den tur e aspektonan menshoná, tin un liña kòrá ta kore, esta: FESTIVAL DI TUMBA PA KARNAVAL A BIRA UN ESPEKTAKULO GRANDI KU TA HALA INTERES DI HINTER PUEBLO DI KÒRSOU.
Seguidamente nos kier a deskribí algun di e susesonan mas remarkabel tantu den e periodo di tumba di sala kubri komo e fase ku a sigui despues den aire liber.
TUMBA DEN SALA KUBRI 1971 – 1978
Manera ya a mensona na inisio di e resúmen aki, e Festival di Tumba a bira un realidat, despues di hopi diskushon i análisis. Semper ora ta trata di un evento nobo, ta kasi imposibel pa bo yega na un organisashon perfekto i komplasé tur hende.
Di tur manera we promé festival di Tumba a ranka Sali i tuma lugá 1 di febrüari 1971 den un Teater Roxy bon bishita. Un total di 14 partisipá a tuma parti i manera ya nos a relatá Boy Dap a Sali e promé Rei di Tumba ku su komposishon “Bash’é”
Manera ta ser bisá historia ta ripití awe for di inisio di nos festival di tumba tabata diskushonnan sea riba e ganadó òf promé finalista.
Un kuerpo di hurado di apénas 3 hende a duna e veredikto i e reglanan di e tempu ei tabata stipulá un máksimo di 5 persona. E promé aña tabata tin diferensia di opinion riba e di dos lugá, na 1972 riba e promé lugá en fin e interes pa e festival ta pone ku tur hende kier trin kos di bisa.
E echo ku na 1973 Asosiashon a tuma e organisashon di Festival di Tumba riba su responsabilidat, a duna un estímulo grandi na músikonan pa partisipá na e festival.
Poko poko e kantidat di partisipantenan a sigui krese i surpasá 40 inskripshon den e promé periodo aki. Resultadonan di e promé periodo aki por haña den e buki di Felio Colinet.
Un parti masha remarkabel tabata e negosiashonnan ku Direktiva di AMAK mester a realisá ku Don Fecho Moron (q.e.p.d.) ku tabata propietario di tantu Teater Roxy komo Cinelandia.
Na momentu direktiva di AMAK na 1977 a komprondé di Sr. Moron ku Roxy lo no ta disponibel opa Festival di Tumba 1977, pa motibu di seguridat, mes ora a mobilisá i aserka Diputado di Kultura di e tempu ei pa por hasi uso di Industriehal na Zeelandia. E festival aki a resultá hopi eksitoso i den presensia di alrededor di 1.500 persona, Rene Samson a Sali ganadó ku e tumba “Antifas di Buriku”, akompañá pa Los Locos Samson.
Na 1978, Sr. Moron a bai di akuerdo pa pone Cinelandia disponibel, pero ya tabata bisto ku mester buska un espasio mas grandi definitivamente pa por ubiká e públiko grandi ku ta sigui krese.
TUMBA DEN AIRE LIBER 1979 – TE KU AWE
Na 1979 direktiva di AMAK a tuma e desishon pa hiba deliberashonnan kui direktiva di Stadion di SUBT, pa organisá e promé festival di Tumba den aire liber.
Naturalmente e presidente di AMAK, Sr. Peng de Windt (q.e.p.d.) i su miembronan di direktiva a realisá ku e organisashon a bira algu distinto ku ta eksigí hopi kambio i preparashon .
E promé aspekto importante tabata e asuntu di konstruí un steidj. E tempu ei Cybeco tabata tin un steidj ku nan tabata usa pa organisá nan sertámen di beyesa. Durante 5 aña Asosiashon a hür e steidj aki serka Cybeco pa un suma di Naf. 1000, pa despues laga traha su propio steidj. E steidj aki tabata un plataforma i tur aña mester a laga traha un lomba di steidj.
E steidj tabata posishoná algun meter dilanti di e mitar tereno ku ta kore entre e dos palu di golnan. Solamente partisipantenan, kolaboradornan, mandatarionan i kuerpo di hurado tabata sinta den tereno, miéntras e públiko tabata sinta den tribuna. E promé aña (1979) ya kaba alrededor di 3.500 persona a bishita e festival. Boy Dap a bolbe marka historia saliendo ganadó ku su komposishon “Sigui Awor”. Tabata un eksperiensha diferente, e ambiente di aire liber.
Tabata tin hopi komentario atrobe, riba e resultado. Na 1980 e di dos Festival den aire liber den Stadion di SUBT, ku a keda ganá pa Harry Zimmerman ku su tumba “Zjogorogo e ta” ku a dal hopi duru. Un tumba ku a dal hopi duru tambe tabata “Hisa bo dede” di Anralis Dap i kanta pa Erwin Kastaneer.
Remarkabel tabata pa e di dos festival den Stadion di SUBT ku algun fanátiko a presentá for di 10 or di mainta, pa di e forma ei nan por sigurá un bon lugá. E aña aki e selebrashon a bai en grandi, komo ku tabata trata aki di e di dos festival di Tumba di Kòrsou.
Despues di Festival di Tumba 1981, a surgi poko malkontentu bou di miembronan di Asosiashon riba funshonamentu di direktiva di AMAK ku for di 1973 tabata tin e siguiente konstelashon:
Presidente Sr. Peng de Windt (q.e.p.d.)
Vise Presidente Sr. Newburn Patrick (q.e.p.d.)
Sekretario Sr. Fecco Gomes
Tesorero Sr. Nelson Boy de Windt
Komisario Sr. Alfred van der Dijs (q.e.p.d.)
Komisario Sr. Trappenberg
Komisario Sr. Virgilio Francinet
Sr. Fecco Gomes for di mei 1980 tabata inaktivo
Miembronan tabata malkontentu pa e forma ku tabata atendé e parti finansiero di e organisashon..
Despues di 1973 no tabata tin reunionnan general anual manera statutonan ta preskribí.
Despues di vários enkuentro ku miembronan a tene, a bai un petishon na Presidente Sr. Peng de Windt pa yama un reunion general. Dia 9 di aprel 1981 den Klup Deportivo Sta. Rosa a skohe e siguiente direktiva:
Presidente Fecco Gomes
Vise Presidente Wilfred Boerleider
Sekretario Toñito Arroyo (q.e.p.d.)
Tesorero Chall Atalita
Komisario Stanley Reinilia
Komisario Wilfrido Valerian (q.e.p.d.)
Komisario Elsio Jourdain ( q.e.p.d.)
Festival di Tumba 1982 a bai hopi bon. Alrededor di 5.000 persona a yena e tribunanan di Stadion di SUBT. Luti Samson a resultá e Rei di Tumba ku e komposishon “Kologá” di René Samson. Un i tur a apoyá e tumba kanto i prensa a elogiá e bon trabou di e direktiva nobo bou di presidensia di Fecco Gomes.
Na 1983 e direktiva nobo a hiba kombersashon ku direktiva di SDK pa organisá e festival di Tumba ku un sètùp nobo. Pa promé biaha lo duna oportunidat pa públiko yega serka dje músiko den vèlt. Pues a duna oportunidat pa públiko sinta den tribuna o kumpra karchi den tereno.
A instalá 25 tènt di kuminda i bebida den tereno. E festival a resultá eksitoso. Sinembargo tabata tin algun aspekto ku no tabata dje benefisioso manera e.o. SDK ta rondoná pa waya i esei a trese ku n’e ku mester a dòbel e kantidat di security pa evitá entrada ilegal. Un total di 7.250 persona a bishita e festival.
Na 1984, direktiva di AMAK a regresá Stadion di SUBT, ku a resultá muchu mas adekuado pa lokual ta trata e infrastruktura. E aña aki direktiva di AMAK a laga konstruí su propio steidj i huntu ku Gerensia di SUBT a mehorá e infrastruktura.
A kontinuá ku e sekshon den tereno i tribuna i e públiko a sigui krese te 8.000 persona. Na 1984 na edat di 19 aña Gibi Doran a resultá Rei di Tumba ku “Habri Sera”, komponé pa su tata Beti Doran (q.e.p.d.)
E festival aki tabata unu ku hopi ambiente. Un bunita steidj, stentnan di kuminda kolorido i un tremendo públiko. Intentonan pa stroba un bon desaroyo di e festival aki a resultá enbano.
Durante di e siguiente añanan, e públiko a sigui krese i na dado momentu despues di Festival di Tumba 1989, direktiva di AMAK a haña un oferta di Sr. Angel Job (q.e.p.d.) pa rekonstruí Golden Drive Inn den un kompleho pa organisá konsierto.Despues di hopi negoshashon pa haña finansiamentu, direktiva di AMAK, teniendo kuenta ku mester buska un sede nobo i despues di a konsulta reunion general, a disidí di bai di akuerdo pa instituí Curaçao Festival Center.
ERA NOBO DI CURACAO FESTIVAL CENTER
E promé festival di tumba, kontra tur espektativa a tuma lugá den febrüari na Curaçao Festival Center, despues ku miembronan di direktiva a traha 5 luna inkansa-bel pa logra keda kla.
Harry Zimmerman a resultá e promé Rei di Tumba den Curaçao Festival Center ku e tumba “E meresé”.
